Akher Sapadli Vaat

मोठ्यांसह लहान मुलांवरही सध्या माहितीचा प्रचंड भडिमार होतो आहे. आपल्याकडे येणाऱ्या माहितीमधलं काय घ्यायचे, काय नाही याचा विचार करायलाही कुणालाच उसंत मिळत नाही. त्याचबरोबर मुलांनी काय बघावे, वाचावे, ऐकावे, यावर ताबा ठेवणे शिक्षक किंवा पालक यांच्या हातात राहिले नाही. त्यामुळे कित्येकदा नको ती माहिती, जगभरात विविध देशात चालू असलेली युद्धजन्य परिस्थिती हे सगळंच मुलांच्या कानांवर पडत आहे. हे चित्र पाहत असताना मुलांच्या मनात भीती उभी राहू शकते किंवा वास्तवाची जाणीव त्यांना अस्वस्थ करू शकते.
अशा वेळी, आशावादी कथा त्यांना दिलासा देऊ शकतात. अर्थात त्यामध्ये वास्तवाचा अंतर्भाव असायलाच हवा. कारण मुलं वास्तव पाहतात, ऐकतात, अनुभवतात. अशा कठीण परिस्थितीतही मार्ग निघतो, काढता येतो; असा विश्वास बालवाचकांना देणाऱ्या एकनाथ आव्हाड यांच्या या कथा आहेत. त्यामध्ये कुठेही खिन्न, विषण्ण असा सूर नाही. तो प्रयत्नवादी, आशावादी आहे.

लेखकाविषयी माहिती :
एकनाथ आव्हाड हे बालसाहित्यकार व कथाकथनकार आहेत. मुंबई महानगरपालिकेच्या शाळेत गेली ३१ वर्षे शिक्षक म्हणून कार्यरत. 'कथाकथन तंत्र आणि मंत्र' या कार्यशाळेचे आयोजन.

पुरस्कार
'छंद देई आनंद' या बालकवितासंग्रहास भारत सरकारचा 'साहित्य अकादमी बालसाहित्य पुरस्कार (२०२३).
महाराष्ट्र शासनाचा 'गंमत गाणी' या जोडाक्षर विरहित बालकवितासंग्रहास 'वा.गो.मायदेव' उत्कृष्ट बालसाहित्य पुरस्कार (२००८), 'शब्दांची नवलाई' या त्यांच्या बालकवितासंग्रहास 'बालकवी' उत्कृष्ट बालसाहित्य पुरस्कार (२०२०)
मुंबई महानगरपालिकेचा आदर्श शिक्षक महापौर पुरस्कार (२००८),
महाराष्ट्र शासनाचा आदर्श शिक्षक राज्य पुरस्कार (२०१६)
अखिल भारतीय साने गुरुजी कथामालेचा उत्कृष्ट कथानिवेदक पुरस्कार (२००८)