ठीक आहे... माफ करा... धन्यवाद

'ओके', 'सॉरी', 'थँक यू' या पुस्तकात "गोष्ट पैशापाण्याची"चे लेखक प्रफुल्ल वानखेडे यांचे विचार आणि प्रसिद्ध व्यंगचित्रकार आलोक निरंतर यांची चित्रे कथात्मक स्वरूपात मांडण्यात आली आहेत. दोन अनोळखी व्यक्तींची रस्त्यावर होणारी सहज भेट आणि त्यातून पुढे जाणारी कथा हलक्या-फुलक्या शैलीत वाचकांसमोर उभी राहते. जीवनातील शाश्वत मूल्यांचा गप्पांच्या माध्यमातून, खुमासदार आणि विनोदी पद्धतीने ऊहापोह करण्यात आला आहे. आजची सामाजिक परिस्थिती, करिअर, आर्थिक नियोजन आणि साक्षरता, वाचनाचे महत्त्व, नैतिकता, सुख आणि दुःख यांसारख्या विविध विषयांवरील विधायक गप्पा सोप्या भाषेत आणि आकर्षक चित्रांच्या माध्यमातून मांडण्यात आल्या आहेत. एक उद्योजक, एक पत्रकार, एक अनुभवी पण खोडकर आजोबा आणि एक होतकरू तरुणी या चार पात्रांच्या माध्यमातून सकारात्मक संदेश अतिशय सोप्या, वाचनीय आणि आकर्षक शैलीत देण्यात आला आहे.