Common Stocks And Uncommon Profits

फिलिप ए. फिशर (१९०७–२००४) हे अमेरिकन शेअर बाजारातील गुंतवणूकदार, ग्रोथ इन्व्हेस्टिंग (Growth Investing) या गुंतवणूक तत्त्वज्ञानाचे अग्रदूत आणि फिशर अँड कंपनीचे संस्थापक होते. १९५८ मध्ये प्रकाशित झालेले त्यांचे 'कॉमन स्टॉक्स अँड अनकॉमन प्रॉफिट्स' हे पुस्तक गुंतवणूक क्षेत्रातील एक अभिजात (Classic) ग्रंथ मानले जाते. या पुस्तकाचा आधुनिक गुंतवणूक विश्वातील दिग्गज वॉरेन बफे यांच्यासह अनेक यशस्वी गुंतवणूकदारांवर मोठा प्रभाव पडला असून, आजही ते मूल्यवान मार्गदर्शक मानले जाते.

पुस्तकाचे अनुवादक कौस्तुभ मोरेश्वर केळकर मेकॅनिकल इंजिनिअरिंगचे पदवीधारक असून त्यांना इंजिनिअरिंग मार्केटिंग क्षेत्रात ३४ वर्षांचा अनुभव आहे. त्यांनी कल्याणी स्टील्स, सुझलॉन एनर्जी, महिंद्रा युजीन स्टील्स, मेगा फायबर अशा अनेक नामवंत कंपन्यांमध्ये मार्केटिंग विभागात काम केले आहे. मेगा फायबर या कंपनीत त्यांनी दहा वर्षे मार्केटिंग विभागाचे प्रमुख म्हणून काम केले.

रिसिव्हरेबल्स मॅनेजमेंट (विक्री देयके वसुली) या क्षेत्रात त्यांचे विशेष प्रावीण्य असून कंपनीच्या कॅश फ्लोमध्ये लक्षणीय सुधारणा करण्यात त्यांचा हातखंडा आहे. तसेच, त्यांनी त्यांच्या कारकिर्दीत विविध पातळ्यांवर बिझनेस डेव्हलपमेंटच्या जबाबदाऱ्या समर्थपणे पेलल्या; आणि अतिशय स्पर्धात्मक परिस्थितीमध्येही त्यांनी ऑटोमोटिव्ह, कन्स्ट्रक्शन इक्विपमेंट क्षेत्रातील अनेक आंतरराष्ट्रीय, देशातील कंपन्यांकडून मोठा व्यवसाय मिळवला आणि वाढवला.

अर्थकारणातील विषयांमध्ये त्यांना आवड असून, २००८पासून सकाळ माध्यम समूहाच्या दैनिक सकाळ, साप्ताहिक सकाळ, सकाळ मनी, सप्तरंग अशा विविध प्रकाशनांमध्ये पर्सनल फायनान्स, शेअर बाजार, वीज, ऊर्जा क्षेत्र, भारतीय आणि परकीय चलन, तसेच रिझर्व्ह बँकेची धोरणे यावर त्यांचे तीनशेहून अधिक लेख प्रसिद्ध झाले आहेत. याखेरीज, २०२२मध्ये त्यांचे शेअर बाजारात करा अभ्यासपूर्ण गुंतवणूक हे पुस्तकही प्रकाशित झाले आहे. कच्चे तेल या विषयावर त्यांचा अभ्यास असून या विषयावरही त्यांनी अनेक लेख लिहिले आहेत, तसेच विविध दूरचित्रवाणी वाहिन्यांवरील 'कच्चे तेल' या विषयातील चर्चेत त्यांनी सक्रिय सहभाग नोंदवला आहे.